Koço Kokëdhima po merr pozita gjithnjë e më të forta brenda Partisë Socialiste.
Propozimi i bërë prej tij për ta shtyrë Kongresin e partisë në janar dhe që nuk u prit mirë nga Gramoz Ruçi dhe disa ministra, duket se ka triumfuar gjithsesi.
Në fakt, 15 dhjetori që ishte përcaktuar si afati i fundit i procesit zgjedhor në strukturat në rrethe nuk është respektuar.
Në bazë të vendimit të Asamblesë, brenda kësaj date duhej të kishte përfunduar zgjedhja e kryetarë të degëve, por Fier, Korçë, Elbasan e Kukës, proceset zgjedhore nuk janë mbajtur, raporton Ora Neës.
Edhe zgjedhja e delegatëve të partisë në degë, duhet të ishte finalizuar në 21 nëntor, por edhe në këtë pikë afatet janë shkelur.
Asambleja kishte vendosur edhe mbajtjen e zgjedhjeve për strukturat e partisë në emigracion, por këto struktura mbeten mbrapa në të gjitha fazat.
Asambleja është organi që mund të vendosë shtyrjen e Kongresit, sipas atyre që kanë kundërshtuar këtë alternativë, por nëse deri më tani ka pasur shkëmbime deklaratash, ardhja e janarit do të kërkojë një vendimmarrje, që ndoshta do jetë edhe një tregues për rrymat brenda partisë më të madhe të majtë në vend.