Deputeti socialist, Ben Blushi ishte në Korçë, në një takim me socialistët, pikërisht në ditën kur edhe Edi Rama ishte në qytetin e Korçës.
Blushi tha se Shqipëria drejtohet nga delirantë dhe të paaftë.
Sipas tij, në PS nuk e ftojnë më në takimet që bëhen.
Duke komentuar akuzat e Edi Ramës se shqiptarët nuk janë të aftë për punë, Blushi tha: “Edi Rama thotë në Korçë se nuk ka kasapë. Mirë, dakord, nëse nuk ka kasapë, Edi Rama ka shumë shokë që kanë vrarë edhe njerëz, të na i sjellin për kasapë në Korçë, por asnjë nuk do i marrë në punë”.
Blushi e krahasoi veten me Forrest Gump, një personazh në filmin me të njëjtin titull.
Tom Hanks luan rolin e Forrest Gump në këtë film shumë të vlerësuar nga kritika.
Gump është një person me probleme të zhvillimit mendor, megjithatë bën një jetë të jashtëzakonshme.
Dashuria e tij për një vajzë është lajtmotivi i këtij filmi dhe zhgënjimi prej saj në disa raste e çon Forrestin të bëjë veprime që as vetë nuk i shpjegon.
Në një rast thjesht nis të vrapojë nga njëri cep i Amerikës në tjetrin, pa dhënë asnjë arsye për këtë veprim.
E nisi i vetëm dhe iu bashkuan mijëra e mijëra njerëz në vrapim.
Pikërisht ky moment e frymëzon Blushin, kur u tha korçarëve se nga pas do i vijnë mijëra.
Megjithatë, në një moment, Gump thjesht e la vrapimin dhe shkoi në shtëpi, duke i lënë gojëhapur mijëra ndjekës.