Partia Demokratike publikoi të hënën një email të Drejtorisë Rajonale Arsimore të Tiranës, duke theksuar se ai tregon se po përgatitet një spastrim politik në arsim.
“Politikat e vërteta të Edi Ramës në arsim nuk janë ato që deklarohen me fjalë e propagandë.
Shihni se si menaxhohet në fakt arsimi, në Drejtorinë Rajonale të Tiranës.
Ky email që po ju tregojmë në ekran u ka shkuar të paktën 76 shkollave të kryeqytetit, ku shefat e arsimit u kërkojnë drejtuesve të shkollave të bëjnë raport të plotë për punonjësit e tyre dhe për bindjet e tyre politike.
Me 27 korrrik ka mbërritur në shkollat e Tiranës një porosi urgjente, ku i kërkohet drejtorëve që deri të nesërmen në orën 11, duhet të dërgojnë listën e stafit dhe përbri, thotë urdhri, bindjen politike për secilin.
Ky skandal paralajmëron fshesën e re që ka ndërmend të bëjë qeveria me mësuesit përpara fillimit të vitit të ri arsimor.
Edi Rama kërkon të kapë kështu çdo segment të arsimit në vend, për ta mbushur me militantë.
Ai i sheh shkollat si organizata të partisë ku meritojnë të jenë në punë vetëm militantët e tij.
Kjo është një goditje fatale që i jepet shkollave dhe mësimdhënies në vend, duke larguar mësues me përvojë e profesionistë dhe duke i zëvendësuar ata me vëzhgues, komisionerë e numërues të Partisë Socialiste,” tha deputeti i PD, Luçiano Boçi.