Muajin e shkuar, Sekretari britanik i Drejtësisë, Michael Gove propozoi se nëse Britania del nga Bashkimi Europian, marrëdhëniet e tyre me BE-në do të imitojnë ato të Shqipërisë me BE-në sa u përket marrëdhënieve tregtare.
Kryeministri shqiptar, Edi Rama, duket i kënaqur, por edhe i habitur.
“Reagimi im i menjëhershëm ishte: A nuk është pak e çuditshme,” shkroi Rama për “The Times”.
Tani, Miriam Gonzalez Durantez, avokate e njohur dhe gruaja e ish-zëvendëskryeministrit britanik, Nick Clegg, ka dalë në mbrojtje të shqiptarëve.
“Imagjinoj se si mijëra britanikë kanë vërshuar të kontrollojnë në Wikipedia se ku është Shqipëria,” shkroi ajo në blogun e saj, “Mama e fëmijë”.
“Sigurisht as ai që ka shkruar fjalimin e ministrit, as ndihmësit e tij, nuk janë shqetësuar për të kontrolluar në Wikipedia, pasi do e kishin kuptuar menjëherë sa absurd është komenti i tyre. Shqipëria është një vend që po përpiqet të bëhet anëtare e BE-së dhe për këtë arsye po punon për të forcuar zbatimin e ligjit dhe për tranzicionin drejt një ekonomie të plotë të tregut”.
Mes atyre që po e ndihmojnë Shqipërinë në tranzicion është edhe Tony Blair, që këshillon Edi Ramën; Alastair Campbell, që ka bërë një ‘rebrand’ për vendin në vitin 2014, dhe Cherie Blair, që punon si avokate e qeverisë shqiptare.
Gonzalez Durantez po vazhdon punën e mirë për trashëgiminë kulinare.
“Shqipëria është një vend i bukur,” thotë ajo.
“Nuk kam qenë kurrë vetë, por kam miq dhe familjarë që kanë qenë dhe thonë se ushqimi është fantastik”.
Për ta bërë më të qartë, ajo poston recetën e fërgesës, një gatim tradicional shqiptar, me djathë, domate dhe speca.
“Të gjithë, me përjashtim të fëmijëve të mi, e pëlqejnë,” shkruan ajo.
Me siguri nuk ka në familje një mashtrues që përkrah largimin e Britanisë nga BE?/Evening Standard