Partia Demokratike anuloi mbledhjen e grupit parlamentar të ditës së premte, ku të pranishëm pritej të ishin edhe ambasadorët e SHBA dhe BE.
Kështu raporton News24.
Sipas tyre, nuk dihen shkaqet e këtij anulimi.
Ambasadorët e SHBA dhe BE lajmëruan se do të ishin të pranishëm në mbledhjet e grupeve parlamentare për të dëgjuar se çfarë kanë për të thënë për arsyet e shtyrjes së miratimit të reformës në drejtësi.
Më herët ishte raportuar se kryetari i PD, Lulzim Basha nuk do ishte në mbledhje për shkak të axhendës së tij.
Ndërsa reforma në drejtësi ka hyrë në një faze të re, lideri i opozitës Lulzim Basha ka përvijuar qëndrimin e Partisë Demokratike pro një reforme që lufton korrupsionin e krimin.
Në përfundim të Samitit të Partisë Popullore Europiane për Ballkanin Perëndimor në Bruksel, Basha ka zgjedhur te vendosë theksin tek zbatimi i kësaj reforme.
“Jo një reformë në letër për të cilën ka kaluar koha, ka dy vjet e gjysmë kjo qeveri që është angazhuar dhe nuk prodhon, madje nuk jep asnjë mundësi të prodhojë një dokument, sigurisht konsensual bazuar mbi parimet europiane, mbi normat e aprovuara nga Venecia. Më e rëndësishmja është implementimi i reformës në drejtësi. Sepse vetëm një reformë që implementohet, vetëm një BKH dhe një SPAK që krijohen do të jenë në gjendje të hetojnë ministrat e korruptuar, zyrtarët e korruptuar shqiptar, t’i çojnë para drejtësisë”.
Lideri i opozitës ka denoncuar në Bruksel korrupsionin, që sipas tij është një fenomen i përhapur kudo, ndërkohë që ka theksuar rëndësinë që ka procesi i dekriminalizimit per demokracinë shqiptare.
“Kam marrë dhe një mbështetje shumë të madhe për monitorimin e zbatimit të ligjit të dekriminalizimit që hyn sot në fuqi, për largimin e parlamentarëve dhe kryebashkiakëve me rekorde kriminale dhe çdo zyrtari publik me rekorde kriminale siç e parashikon ligji”.
Basha ka diskutuar në Bruksel edhe çështjen e zgjedhjeve te lira, duke theksuar se Shqipëria nuk mund të hapë negociatat per anëtarësim pa treguar se është në gjendje të ketë zgjedhje të lira dhe të ndershme.