“Nuland është shumë e drejtpërdrejtë. Është e mprehtë, e këndshme në bisedë, por mund të bëhet jodiplomatike- këto veti janë të rrezikshme për një diplomat. Diplomatja amerikane vlerësohet si konservatore. Në rast të fitores së zgjedhjeve nga republikanët vitin e ardhshëm, ajo mund të bëhet ministre e Jashtme. Është e martuar me Robert Kagan, një mendimtar konservator. Vitin e shkuar ai publikoi një tekst të debatueshëm se pse Amerika duhet të jetë fuqia e padiskutueshme kryesore në botë”.
Kështu shkruante para pak ditësh revista më e madhe europiane, Spiegel, për Victoria Nuland, Ndihmës Sekretare për Çështjet Europiane dhe Euroaziatike në Departamentin e Shtetit.
Nuland mbërriti në Tiranë të hënën për një vizitë dhe takime me zyrtarët më të lartë të shtetit.
Sërish në sytë e fotografëve ra takimi i saj i ngrohtë me Lulzim Bashën, njësoj si në vizitën përpara kësaj.
“Kam marrë mbështetjen e plotë nga ndihmëssekretarja e Shtetit znj.Nuland, të SHBA-ve, për përpjekjet e Partisë Demokratike dhe platformën tonë për të trajtuar këto probleme kryesore të demokracisë shqiptare. Pikësëpari çështjen e dekriminalizimit, për të ecur përpara me axhendën tonë të dekriminalizimit në mënyrë që qytetarët shqiptarë të kenë atë që meritojnë, një parlament dhe pushtet vendor të pastër nga personat me rekorde kriminale,” tha Basha pas takimit.
