Partia Demokratike vazhdon të trajtojë në konferencat e saj për shtyp punësimet e militantëve në administratë.
Sekretari i Përgjithshëm, Arben Ristani ripublikoi një letër të nëndrejtorit të Burgjeve, drejtuar kryeministrit Edi Rama, që është publikuar më parë nga mediat.
“Kemi sot këtu, një letër konfidenciale që zëvendësdrejtori i përgjithshëm i Burgjeve, Bledar Skenderi, ia drejton Edi Ramës, ku tregohet se si, në të vërtetë, kryhen punësimet në shtetin e Edi Ramës.
Ky zyrtar i lartë e informon Edi Ramën se nga tetori i vitit 2013 e deri në gushtin e 2014, nga 762 emërime, vetëm 300 i ka bërë partia socialiste, ndërsa 462 i ka bërë LSI.
Zyrtari i lartë ankohet se LSI nuk po respekton marrëveshjen për ndarjen e pushtetit.
Ky zyrtar ankohet se disa drejtorë burgjesh, punësojnë njerëz sipas dëshirave të tyre dhe nuk marrin në konsideratë listën zyrtare me emra që i ka çuar Partia Socialiste.
Ai i sugjeron Ramës që Partia Socialiste duhet të marrë nën drejtim burgun e Fierit pasi aty ka 700 vende pune.
Ja pra kush është shteti i Edi Ramës,” tha Ristani.
Ndërkohë një ditë më parë u publikua një email, ku deputeti Taulant Balla u kërkon deputetëve të punësojnë në zyrat elektorale persona që do orientojnë njerëzit e PS për të aplikuar për vendet e lira.
Por shihni pak se kush është në krye të adresave që iu drejtohet Balla: Tom Doshi.
