Botuesi i gazetës “55”, Fahri Balliu vjen në një intervistë ndryshe për gazetën “Mapo”, ku komenton rezultatin e zgjedhjeve për PD-në, domosdoshmërinë për analizë, marrëdhënien Berisha-Basha, dhe mundësinë e një koalicioni me Metën
Intervistoi: Nevila Perndoj
Botuesi i gazetës “55”, Fahri Balliu flet për shumëçka në një intervistë për gazetën “Mapo”. Ai komenton rezultatin e zgjedhjeve për PD-në, arsyet se pse u humbën bashki që administroheshin më parë nga e djathta, pse humbi Durrësi, Tirana apo Elbasani, si dhe komenton faktorët surprizë në fitoren e bashkisë së Pogradecit. Balliu flet edhe për marrëdhënien Berisha-Basha, të cilën ai e sheh të unifikuar. Por çfarë duhet të marrë Basha nga Berisha? “Ai duhet të marrë më shumë shkurtimin e kohës së vendimmarrjes dhe guximin për vendimmarrje…”, – shprehet ai. Një gjë është e sigurt, për botuesin e gazetës “55” se, bazamenti i veprimtarisë së tyre politike është gati i përafërt. Balliu flet edhe për mazhorancën ndërsa thekson ndër radhë se në zhvillimet politike të së ardhmes, ai sheh se tek e majta do të ketë shumë probleme. Ai nuk përjashton gjithashtu një koalicion të Metës me Bashën apo çdo lloj koalicioni tjetër nëse, sipas tij, e imponon interesi kombëtar. “…Unë them edhe njëherë se, nëse interesi kombëtar e kërkon, çdo lloj koalicioni pa hezitim që duhet bërë. Sepse interesi kombëtar është interesi i qeverisjes së kombit. Ajo është krejt normale…”, – shprehet ai.
Z. Balliu, PD-ja ka përgatitur një dosje ku pretendohet për një sërë shkeljesh, duke i cilësuar zgjedhjet e 21 qershorit, si farsë. A mendoni se rezultati që mori opozita lidhet vetëm me faktorët që Basha ka përmendur, si blerja e votës, kandidimi i njerëzve me rekorde kriminale, presioni ndaj administratës… etj., apo ai lidhet ngushtësisht edhe me defektet që u evidentuan në pjesën e organizimit të partisë?
Së pari, nuk është bërë ende një analizë që të dalim në konkluzionin se cilët ishin faktorët e humbjes apo fitores në disa njësi të vendit. Së dyti, këto nuk kanë lidhje me njëra -tjetrën. Shkeljet e zgjedhjeve janë një çështje tjetër.
A janë shkeljet aq të mëdha sa edhe mosfunksionimi i strukturave në këto zgjedhje?
Këto nuk maten me volume… Kur zgjedhjet cenohen, autoriteti i tyre bie, besueshmëria bie dhe duket sikur lumin mund ta kalosh me ato rezultate që certifikohen, por në fakt ato janë një investim që mbetet brenda partive dhe ngrenë krye në zgjedhjet politike. Prandaj ‘o i gëzuar mos u gëzo, o i hidhëruar mos u hidhëro’ sepse ato çka të janë marrë do të kthehen, madje më me forcë, më me shumicë, sepse gënjeshtra e parë në opinion nuk rrit gënjeshtrën e dytë, rrit rrezikun, por nuk rrit gënjeshtrën. Përkundrazi, vetë realiteti postzgjedhor i bën njerëzit që të jenë gjakftohtë, të kuptojnë se si kanë qenë të orientuar, sa kanë qenë të manipuluar dhe sa kanë qenë të vërtetë në përkatësinë dhe vullnetin e tyre. Prandaj unë mendoj se euforia, veçanërisht e kryeministrit Rama, është tipike e një sjelljeje amatore në politikë, pasi çdo gjë që ka qenë artificialisht e përfituar prej tyre nëpërmjet dopingut të parave, mashtrimit, marifeteve të ndryshme, do të shndërrohet në një bumerang për ata vetë.
Duke e riformuluar pyetjen, sa mendoni se kanë ndikuar shkeljet e evidentuara në rezultatin e zgjedhjeve?
Unë mendoj se ato kanë luajtur rol veçanërisht në bashkinë e Prrenjasit, ku Taulant Balla është një nga grabitësit e kutive të Stravajt. Mendoj se kanë luajtur shumë rol në Pukë, kanë luajtur rol në Fushë-Arrëz, sidomos në Has, ku humbja i përket zgjedhjes së gabuar të kandidatit; si dhe në shumë bashki të tjera, siç janë Saranda, Kolonja, Maliqi, Dibra.
Ju folët për disa bashki ku kanë ndikuar shkeljet në rezultatin e zgjedhjeve, megjithatë në disa bashki të tjera, përfshi edhe Dibrën që ju përmendët më sipër, çfarë nuk funksionoi si duhet në strukturat e partisë?
Fillimisht funksionuan akuzat që PD-ja bëri për zgjedhjet, siç është blerja e votës, përdorimi i administratës, përdorimi i resurseve të pushtetit në përgjithësi. Por në rastin e Dibrës që ju përmendët ka edhe faktorë më subjektivë, siç është roli i ndonjë të pakënaquri, ku u përpoqën ta fraksionojnë figurën e kryetarit dhe të ndërtojnë disa figura artificiale, të cilat e grabisnin kutinë e madhe të votimit të PD-së dhe për këtë arsye atje ka nevojë për analizë konkrete, praktike, me emra, sepse Dibra është plaçkitur nga pushteti me këto forma.
Në këndvështrimin tuaj, në cilat bashki ka më shumë nevojë për analizë nga ana e PD-së?
Për analizë ka shumë. Tek të gjitha duhet ndalur për analizë. Edhe në ato që janë fituar. Sepse ka bashki që është fituar, por që struktura e PD-së nuk ka qenë në nivelin e duhur dhe është fituar në bazë të zemërimit të opinionit publik me pushtetin. Ka qenë meritë e vetë elektoratit që është orientuar kështu. Prandaj nuk do të thotë fakti se aty ku është fituar nuk ka nevojë për analizë. Analizë ka nevojë tek të gjitha. Por unë dua të nënvizoj se në këto zgjedhje, veçanërisht PS-ja dhe përgjithësisht koalicioni i majtë vunë në dukje disa nga shfaqjet më të errëta të historisë së të majtës në Shqipëri, që nga vjedhjet e zgjedhjeve të ‘91, përpjekjet e ’92-it me terror dhe pastaj në zgjedhjet e qershorit të ’97-s, që kanë qenë të terrorizuara, të 2001-it që janë të vjedhura në mënyrë drastike, deri te shembulli më skandaloz dhe i turpshëm që ka qenë deputetja e miellit, Valentina Leskaj, e cila shpërndante miell në mënyrën më të turpshme, dhe sot e majta e bën atë edhe nënkryetare të Kuvendit. Edhe tek këto zgjedhje u shfaqën dukuri të tilla dhe e majta ruajti këtë fizionomi, që nuk mund ta pranojë demokracinë dhe garën në mënyrë të lirë. Nuk e ka pranuar asnjëherë.
Duke pasur parasysh këtë background, që sipas jush është i hershëm, a duhej opozita që të ndiqte një strategji më konkrete, a doli opozita e papërgatitur përballë kësaj situate?
Jo, kjo nuk është e vërtetë. Është si të thuash që, meqenëse ka hajdutë dhe kriminelë në anën tjetër, të bëjmë edhe ne një strategji kriminale dhe vjedhjeje.
Cila është zgjidhja atëherë, se në këtë formë opozita mund të ankohet edhe pas dy vjetësh?
Këtë do ta ndëshkojë vetë opinioni dhe gjyqtari ndërkombëtar. Ky i fundit sigurisht do të vërë një kufi të rëndësishëm në gjykimin e këtyre zgjedhjeve, sepse këto zgjedhje janë të përziera me krim, dhunë apo edhe raste kërcënimesh para dhe gjatë zgjedhjeve. Unë mendoj se e majta do të çlirohet dhe emancipohet e fundit në demokraci, sepse këtu e majta ka qenë bastioni që nuk e lejonte pluralizmin, bastioni që nuk hynte në NATO, bastioni që kishte fobi nga linja euro-atlantike dhe ajo çlirohet vit pas viti, zgjedhje pas zgjedhjeje, përpiqet herë ta rimarrë fizionominë e tij, herë ta lëshojë, por krushqia e fundit dhe e fillimit të tij është me krimin dhe në këto zgjedhje ajo u shfaq rëndë dhe kjo ka tronditur edhe faktorin ndërkombëtar, i cili është me detaje i mirinformuar. Unë besoj se PD-ja do të gjejë rrugët e ballafaqimit në zgjedhjet e 2017-s për t’i konkretizuar gjërat në një fitore.
Pse dukeni optimist se zgjidhja do të gjendet tek opinioni publik, kur PD-ja në këto zgjedhje fitoi vetëm 25% të territorit; pse mendoni se opinioni publik do ta përmbysë këtë raport, këtu kam parasysh edhe faktin se aty ku pati kandidatë që u denoncuan nga opozita si të inkriminuar, ata fituan bindshëm nga e majta… A duhet që PD-ja të gjejë zgjidhjet e saj politike dhe mos ta lërë këtë vetëm në dorë të opinionit publik?
PD-ja pikërisht këtë po bën. Së pari po kërkon ta institucionalizojë dekriminalizimin me gjithë përpjekjet që po bën kryeministri Rama për ta kundërshtuar.
Por mazhoranca ka votat…
Kjo nuk është e vërtetë. Këto faza kanë qenë të njohura dhe kanë kaluar në shumë shoqëri demokratike. Votat i ka pasur edhe mafia në Palermo dhe Siçili, por la kokën e vet dhe pushtetin. Kjo do një pjekuri të shoqërisë dhe shkallë të lartë emancipimi, do një luftë ballafaquese parlamentare, do padyshim asistencë dhe mbështetje ndërkombëtare. Duhet të dini një gjë që, një votë e vjedhur nuk është një kapital që mund ta hipotekosh. Ti mund ta marrësh atë, por nuk e hipotekon dot në fatin e partisë apo të linjës tënde politike. Vota që hipotekohet dhe mbetet si pasuri e zhvillimit të shoqërisë dhe e fitores të së drejtës dhe të lirisë është vota që merret me meritë. Atë votë të pahipotekuar mund ta gëzosh përkohësisht, por do ta paguash më shumë sesa mund ta mendosh dhe imagjinosh dhe zakonisht këta lloj pushtetarësh i pret i njëjti fat që i pret protagonistët e tyre që u sigurojnë votat, me dhunën, krimin, mashtrimin dhe vjedhjen.
A keni ndonjë koment për mënyrën se si u menaxhuan zgjedhjet nga PD-ja në Tiranë, Elbasan dhe Durrës, duke u nisur edhe nga fakti se rezultati që u mor nuk iu përgjigj figurës së kandidatëve respektivë?
Mendoj se duhet analizuar secila prej tyre. Një nga rastet që i përket shpjegimit tim të mësipërm është rasti i Durrësit, ku PD-ja kishte një nga kandidatët, një nga gjeneratorët më të fuqishëm të mesazhit strategjik politik të së djathtës siç ishte znj. Grida Duma, e cila në totalin e vet ishte një kandidate e fuqishme, e zonja, që e pëlqenin, e miratonin edhe militantë të së majtës. Ajo bëri një fushatë të shkëlqyer nga gjithë parametrat që ka një fushatë. Me rastin e Durrësit ne kemi një investim të hipotekuar, që në një moment të caktuar do ta japë rezultatin me një shpërthim masiv të votës. Zgjedhjet janë një rebus. Zgjedhjet nuk janë aritmetikë, zgjedhjet duhen lexuar. Por që t’i lexosh zgjedhjet, duhet të bësh ekspertizë serioze. Znj. Duma në Durrës kishte një mospërputhje midis saj që ishte një fadromë e fuqishme politike dhe një strukture partiake me fraktura të rënda ku përfshihet kryetari i partisë, ku përfshihet një grup ish-drejtorësh, të cilët tre prej tyre janë në prokurori dhe këtu është një gabim i pafalshëm aktivizimi i tyre dhe shkuarja me mendimin komunist që të jemi të gjithë bashkë. Në qoftë se ke një drejtor të korruptuar që është në gjyq, që njihet si hajdut, në qoftë se ke një kryetar partie në Durrës, që nuk ka kapacitet intelektual dhe përdor folklorizma nëpër aulat e të folurit për zgjedhjet apo në qoftë se ke një intrigant, i cili përpiqet që të ndërtojë klane dhe grupe të caktuara, atëherë duhet në mënyrë absolute që të ndahesh sepse kështu fiton. Sepse ti i thua opinionit publik që unë e kam ndëshkuar këtë njeri që ka vjedhur, që ka menaxhuar miliona euro dhe që ka vajtur në dyert e gjyqit. Këta njerëz, ç’lidhje kanë me zgjedhjet? Në këtë kuptim, në qoftë se struktura e partisë në Durrës do të ishte në përmasat e kandidates, nuk do të kishte shanse për të humbur. Pastaj duhet të jemi realistë. Kur ne flasim për kandidaturat tona, duhet të flasim edhe për kandidaturat e kundërshtarit. Dhe kandidatura e kundërshtarit duhet vlerësuar. Ka njerëz me prerje të posaçme të aftësisë për zgjedhjet, që dinë të bëjnë atë lojën me porta hungareze të zgjedhjeve. Dhe këta faktorë duhen vlerësuar më qëllim që, kur hyn në betejë duhet të bësh ekspertizën se kë kam unë përpara, ku i ka ky kandidat cilësitë më të forta dhe më të dobëta. Pavarësisht kësaj, unë mendoj se nga Durrësi ne kemi mbjellë një pemë, e cila do të japë frytet e veta bashkë me një rikonstruksion të fortë të strukturave të partisë.
Kush mban përgjegjësi për këto fenomene?
Ka një lojë që ka qenë para zgjedhjeve, gjatë dhe pas zgjedhjeve por edhe gjatë kohës që zgjidhej kryetari i partisë dy vjet më parë, që të sulmojmë Lulzim Bashën. Është ndryshe përgjegjësia dhe është ndryshe sulmi që ta përqendrosh te kryetari i partisë, sepse ke iluzione dhe do të shkelësh normat statutore të partisë, që të shmangësh një analizë realiste, ku çdo njeri ka përgjegjësinë e vet. Në radhë të parë çdo njeri mban përgjegjësinë e vet, pastaj vjen çështja tek kryetari. Përqendrimi i çështjes tek kryetari do të thotë që të mos bësh analizë. Pse nuk paska përgjegjësi shefi i fushatës së Vlorës, që është sekretari i përgjithshëm i partisë, pse nuk paska përgjegjësi ish-ministri i ngarkuar për zgjedhjet në Elbasan? Të bëjmë këtë një herë. Por këtu është krijuar një traditë e keqe që dha dorëheqjen Berisha dhe ish-ministrat përgjegjës për partinë të niveleve të larta të tij u mjaftuan me kaq. Ka pasur raste në këto zgjedhje, si për shembull rasti i një ish-ministri që pasi ka qenë tetë vjet ministër ka kërkuar edhe 20 litra naftë për fushatën në Tiranë apo Elbasan. Fryma për të sulmuar kryetarin e partisë, i cili kishte provën e parë për këto zgjedhje, është krijuar për të shmangur përgjegjësinë dhe rolin e njerëzve të ngarkuar posaçërisht për zgjedhjet që kanë në kurriz rezultatin e çdo bashkie. Duhet bërë kjo në radhë të parë, pra analiza e degëve ku është humbur dhe ku është fituar dhe më pas të vijmë tek kryetari, i cili e di mirë se ku i çalon problemi pasi të dalë kjo analizë.
Si është marrëdhënia e kryetarit të partisë dhe ish-ministrave pas zgjedhjeve, çfarë duhet të bëjë Basha në këto raste?
Atë e di Basha se çfarë duhet të bëjë. Por një gjë është e qartë, se secili prej tyre; ish-ministër, deputet e ish-deputet duhet që secili prej tyre të marrë shembullin e Berishës, duhet t’i propozojë vetes se çfarë duhet të bëjë pas kësaj që i ka ndodhur, pastaj janë forumet ato që përcaktojnë prerjen përfundimtare. Por secili prej tyre nuk mund të fshihet pas arsyetimit që hajde e të sulmojmë Bashën. Ata duhet të dinë një gjë. Që, ashtu siç janë partitë pasuri kombëtare, edhe liderët e tyre janë pasuri kombëtare. Dhe ne nuk mund të krahasojmë sinqeritetin e Bashës se pse doli në këtë rezultat PD-ja me mashtrimin dhe manipulimin e liderit të PS-së, përkundrazi, unë mendoj që me Bashën kemi një nga liderët e Ballkanit me fizionominë më euro-perëndimore dhe euro-atlantike dhe gjithkush duhet të jetë i kursyer në sulmin e modelit të sherreve të pafundme dhe intrigantëve jashtë PD-së, që nuk shohin dhe nuk dinë asgjë realiste atje, por përfaqësojnë vetëm interesin dhe përfitimin e vet që u është ndërprerë. Në qoftë se njeriu i ngarkuar për shembull në Korçë mban përgjegjësi për rezultatin, atëherë ai është ok. Ai mban përgjegjësi dhe thotë që aq tregova. Ke qenë tetë vjet ministër. Vajte në Korçë humbe, vajte në Elbasan humbe. Basha duhet të rivlerësojë dhe vlerësojë fort ata njerëz që drejtuan fushatën në vendet ku fituan. Për shembull në Devoll duhet vlerësuar njeriu që e mori Devollin, i cili pak më përpara ishte i deleguari i partisë në Burrel dhe ndërtoi një parti që çoi në fitoren e bashkisë. Dhe ky arrin dy fitore brenda dy vjetësh. Një në ndërtimin e partisë së Burrelit që i dha fitoren më pas të bashkisë dhe një që drejtoi drejtpërsëdrejti fushatën në Devoll. Këtu duhet të jesh i sinqertë. Ore sa peshon. Ore sa vlen. Ore çfarë rezultati jep. Sepse po t’i hysh asaj se çfarë ke marrë me atë se çfarë ke dhënë, nuk kanë të krahasuar.
Folëm për ish-ministrat që janë pjesë e konsiderueshme edhe e grupit parlamentar të PD-së. Fundja ata janë produkt i 2013-s dhe i qeverisjes tetëvjeçare të PD-së. A e shihni ju grupin parlamentar të unifikuar me kryetarin e PD-së, Basha, dhe kryesinë e partisë?
Nuk ka asnjë shkëputje mes tyre. Edhe pse unë jam shumë kritik ndaj këtyre që patën përgjegjësi në zgjedhje, mund të them se në grup parlamentar kur diskutojnë ata janë ok. Dhe nuk shoh që ata të anatemohen. Përkundrazi. Atje ku është e mira, ne duhet ta nxisim dhe perfeksionojmë, sepse çdo e mirë do të sjellë të mira të tjera. Por atje ku rezultati është negativ, atje t’i bëjmë ekspertizën e thellë e të pamëshirshme pasojës që solli këtë rezultat.
Flasim pak për raportin Berisha-Basha. Berisha njihet për modelin e tij politik imponues e për pasojë, a mendoni se me këtë model të pandryshueshëm Berisha po imponon në vendimet politike të Bashës, a ka një lloj dualizimi në PD në marrjen e vendimeve politike të rëndësishme? (E bëj këtë pyetje pasi ju i njihni nga afër, si Berishën, ashtu edhe Bashën)…
Kjo është një nga pistat ku e majta përpiqet që të ngrejë një legjendë, një përçarje, një punë të pandershme. Berisha është një personalitet historik. Të tjerët janë personazhe. Berisha është emblema, siç thoshte ‘Financial Times’ një vit, apo dy vite më parë në korrik, emblema e mposhtjes së komunizmit shqiptar. Berisha është një personalitet me një kulture politike para se të hynte në politikë, me një kulturë letraro-historike shumë të fuqishme. Dhe kjo është një diferencë e madhe e tij me këta kopertinierë që shkojnë deri tek faqja shtatë a tetë dhe pastaj bëjnë sikur e kanë lexuar. Pra, ai ka një fond shumë të madh dhe ndërkohë ai u pasurua me një veprimtari politike jashtëzakonisht të fuqishme ku kaloi sfida shumë të mëdha. Në të gjitha kohët, si në opozitë, ashtu edhe në pushtet, ai është faktor. Ky është një mal politik që Basha ka përpara dhe në çdo moment mund të thurësh fantazi, por unë të siguroj se Berisha, veçanërisht në këto zgjedhje është absolutisht me sjelljen e tij më brilante për t’i lënë dorë vendimmarrjes së Bashës. Kurrkush nuk mund të provojë një rast të vetëm që ai është imponues. Përkundrazi, ai është vetë luftëtar. Pra brenda PD-së, ai është zë dhe arsyetim jashtëzakonisht i rëndësishëm. Sepse kur ai ka një të drejtë, ti ia thua si imponim. Por nëse ai ka të drejtë, ai nuk është imponim. Vetëm të jetë i çmendur Lulzim Basha dhe e gjithë PD-ja që kur ky sjell një argument të vërtetë në Kuvend, të mos e bëjë target për betejë dhe për luftë. Këtu nuk kemi të bëjmë me dualitet, por përkundrazi me një bashkëpunim komplementar në kuptimin që Berisha duke qenë një kasetë e fuqishme filmike kundër pushtetit, ai është në të njëjtën kohë edhe një faktor i rëndësishëm dhe si i tillë, do apo nuk do, ai është një mal politik dhe nuk ke se çfarë bën. Në anën tjetër, vetë Basha brenda PD-së ka ravijëzuar profilin e vet politik. Ai ka marrë disa masa dhe ka gjetur një ekip të tij dhe këtë ekip, ashtu si edhe gjeniun më të madh asnjëherë nuk e mbron dot nga gabimi. Tani këta kërkojnë që ky njeri që ka dy vjet që ka ardhur në krye të partisë, të ketë të njëjtat cilësi si ai që ka 25 vjet, që janë diametralisht jetë të ndryshme. Lulzim Basha është një autostradë politike në të cilën PD-ja kohë pas kohe, vit pas viti, zgjedhje pas zgjedhjeje, aksion pas aksioni politik do të dalë në fitoren e së djathtës.
Çfarë duhet të marrë Basha nga Berisha dhe çfarë nuk duhet?
Basha nga Berisha duhet të marrë më shumë shkurtimin e kohës së vendimmarrjes dhe guximin për vendimmarrje…
Çfarë nuk duhet të marrë Basha nga Berisha?
Nuk jam në gjendje ta them, sepse çdo lider duhet ta absorbojë brenda stilit të vet dhe nuk e di a i shërben për mirë që të mos marrë apo i shërben për keq. Një gjë është e sigurt, që bazamenti është gati i përafërt i veprimtarisë politike…
Si e shikoni marrëdhënien Berisha-Basha në të ardhmen…? A e shihni të gjatë bashkëpunimin mes tyre, apo parashikoni edhe krisje?
Unë mendoj se Berisha është lider mirënjohës për bashkëpunëtorët e vet. Berisha mund të mos e dojë një njeri. Mund të mos ketë preferencë pozitive, por nuk e shkel kurrë vlerën e tij. Përkundrazi, ai ka mirënjohje për bashkëpunëtorët. Ashtu siç ua vë në dukje edhe të metat, mangësitë sa të duash…
Ia ka vënë edhe Bashës në dukje mangësitë?
Padyshim që duhet t’ia ketë vënë dhe kjo është krejt normale. Por, Berisha mbetet një mik i madh për të gjithë bashkëpunëtorët në politikë dhe jashtë saj dhe në këtë kuptim ai ka një vlerë morale shumë të madhe sepse nuk ka atë që e kanë të tjerët që sot e ka ministër, nesër kapistër pastaj se njeh fare. Në këtë kuptim, ai inkason edhe tek Basha një kulture sjelljeje politike shumë të madhe, shumë evropiane, shumë qytetëruese prandaj unë mendoj se ai do të jetë përherë një bashkëpunues në të mirë të forcimit të aspektit ideologjik, praktik, menaxherial të së djathtës.
Dua të prek pak çështjen LSI. Pak kohë më parë, kryetari i PR-së, Fatmir Mediu tha se gjatë dy fushatave të fundit ai kishte dëgjuar eksponentë të PD-së, që shpreheshin se duhet të ishin të kujdesshëm me LSI-në, pasi ata mund të bëheshin prapë me PD-në…A mbetet LSI-ja një kamerdare shpëtimi në PD, që kjo e fundit të vijë në pushtet? Sa i mundshëm është rikthimi i Metës me Bashën në qeverisje?
Për një vend demokratik, për rregullat që janë në demokraci, për kulturën në demokraci ashtu si edhe në diplomaci, për asgjë nuk duhet thënë kurrë. Por liderë të partive të dyta të vogla zakonisht nuk japin ekspertiza të sakta. Sepse nuk u jep fronti që ata kanë prapa që të japin ekspertiza. Ata duhet të mbijetojnë për veten e tyre.
Marrë shkas nga kjo deklaratë në fakt për të mësuar nëse ekziston një opinion i tillë?
Këto janë më shumë si thashetheme. Për mua në periudhën e bashkëpunimit me LSI-në, Berisha ka qenë superkorrekt dhe e ka thënë edhe Meta këtë gjë, ashtu si edhe Berisha. Berisha u qëndron marrëveshjeve, atë çka e thotë, atë bën. Ai di vetë ta çojë aty ku ti ke rënë dakord. Në zhvillimet politike të së ardhmes unë shoh se tek e majta do të ketë shumë probleme dhe këta ekspertë, gazetarë, politologë, opinionistë që e përkëdhelin me servilizëm dhe nuk shohin asgjë nga këto negacione të thella të turpshme të qeverisjes Rama do të jenë “varrmihësit” të tij dhe kjo tregon që ne kemi shkallë të ulët emancipimi ku doza e meskinitetit dhe e prirjes me interesa është themelorja. Unë personalisht nuk kam marrë asnjë post ndonjëherë nga Berisha kur unë kam parë çdo gjë dhe çdo individ që i ka marrë ato poste për secilin prej tyre jam në gjendje që të bëj nja pesë libra megjithatë kjo nuk më ka penguar, nxitur që të bëhem një kasandër, përkundrazi. Në qoftë se në një grupim politik, në një bashkëpunim politik ti hyn sepse të bashkojnë idetë, të bashkon formimi yt dhe të çon në atë drejtim, rri aty. Të tjerat nuk kanë rëndësi, të tjerat pastaj të bëjnë meskin. Të bëjnë të vogël. Njëri do të dalë i pavarur. Njëri do të bëjë parti, do të ikë tek Rama… etj. Kush bashkohet me ndërgjegjen dhe formimin e tij politik nuk bën teatër.
Pra, ju mundësinë e një bashkëpunimi me Metën nuk e shikoni oportunizëm?
Atë e sugjeron realiteti, e sugjerojnë rrethanat politike, e sugjerojnë me Metën dhe me çdo parti. Nuk do të thotë asgjë. Nuk ka këtu surpriza.
A po e impononi edhe votuesin që të jetë kaq pragmatist, z. Balliu, sepse kjo u vu re edhe në zgjedhjet e 2013-s dhe u pa rezultati. Kur ti bën sërish koalicion me Metën, atëherë pse ai votues që ka votuar tradicionalisht për PD-në, për një rrethanë të caktuar nuk mund të votojë për PS-në?
Jo. Kjo nuk ka lidhje. Sepse ti do të votosh një herë për partinë tënde. Kështu që ti tregon përkatësinë tënde me votën. Shikoni Merkelin se si e bën qeverinë. Shiko në Amerikë se çfarë ndodh. Janë interesa të mëdha kombëtare. Duhet parë interesi i kombit në radhë të parë. Për këtë arsye, demokracia vetë i ka të hapura dyert.
Po flasim në emër të interesit kombëtar apo domosdoshmërisë së numrave? A mund të vijë PD-ja në pushtet e vetme?
Unë besoj që po, në 2017-ën.
Sepse zgjedhjet e 2005-s dhe 2009-s treguan rezultat pozitiv për PD-në, por Berisha bëri koalicion me Xhuvelin dhe më pas me Metën që të qeveriste në kohë të ndryshme…
Ato janë çështja teknike dhe jo strategjike. Prandaj unë them edhe njëherë se nëse interesi kombëtar e kërkon, çdo lloj koalicioni pa hezitim që duhet bërë. Sepse interesi kombëtar është interesi i qeverisjes së kombit. Ajo është krejt normale.
Për shumëkënd zgjedhjet në Pogradec ishin surprizë… Çfarë e solli fitoren e së djathtës në këtë njësi?
Ashtu siç e certifikoi edhe Rama në Tv kur tha se kandidati Eduard Kapri është kandidati i Fahri Balliut, ashtu siç nuk la gjë pa thënë jo vetëm në Tv, por edhe kur shkonte atje lakonte gjithnjë emrin tim. Unë e propozova kandidatin Kapri dhe është meritë e kryetarit të PD-së, Lulzim Basha dhe lidershipit të saj që pati besim tek ky propozim. Faktori themelor i fitores në Pogradec ishte kandidati, i cili është një djalë i ndershëm, një ekonomist, drejtues dhe menaxher biznesi i mrekullueshëm, me një familje me reputacion absolut. Përkundrazi, strukturat e partisë lokale nuk ishin në gjendje që ta thithnin këtë vlerë të tij dhe ishin demokratët dhe militantët e PD-së që i gjetën mbështetje më shumë sesa vetë struktura e emëruar. Kështu që është një rast shumë specifik. Prandaj edhe tek fitorja duhet bërë analizë. Arsye tjetër e surprizës në Pogradec, bashki me një orientim të majtë është se ish-kryetari i bashkisë, Artan Shkëmbi ishte anatemuar si një nga kryehajdutët e Shqipërisë, për të cilin janë bërë tendera që ta shpëtojnë nga burgu. Ai ka qenë një nga abuzuesit më të mëdhenj me tenderat nëse shohim edhe raportin e KLSH-së. Elektorati i majtë ishte shumë i zhgënjyer nga vjedhjet e tij, nga sharlatanizmat e tij dhe për fat të keq, ndonjëherë ai kishte mbështetje edhe nga ndonjë hierark i lartë i PD-së. Opinioni i Pogradecit e kishte konfirmuar atë si një të keqe të madhe. Këto ishin dy shtyllat kryesore, pastaj vjen edhe kandidatura që u zgjodh nga lidershipi i LSI-së, e cila ishte shumë anemike. Mund të ishte në vetvete një gjë pozitive por nuk kishte impakt në publik. Gjithë fushata e Kaprit u ndërtua mbi bazën e projekteve, që ai ofroi. Nga PD-ja pati mbështetje të madhe, erdhi Pollo që ishte shumë aktiv e deri tek forumet e Rinisë apo dhe ajo e Gruas, si Albana Vokshi. Pra pati koordinim të strukturave, e kundërta e asaj që ndodhi në Durrës.