Kreu i Aleancës Kuqezi, Kreshnik Spahiu ka shpallur sot gjatë një takimi në Akademinë e Arteve, platformën politike të Aleancës Kuq e Zi për zgjedhjet e viti të ardhshëm.
Nën moton “Shqipëria s’po ndryshon”, Spahiu tha se vendi ynë nuk ndryshoi as nga grushti, as nga dy gishtat dhe as nga gishti i “frroços”, duke ju referuar kështu deputetit socialist, Kokëdhima, i cili para disa kohësh u fotografua duke treguar gishtin e mesit në Parlament.
Kryetari i AK-së, Spahiu, e ka hapur takimin me urimin për besimtarët katolikë për Festën e Pashkëve dhe ka zgjedhur për të recituar disa vargje të poetit kombëtar dhe klerikut At Gjergj Fishta, në të cilat jep mesazhin e një kombi pa ndasi.
“Shqipëria nuk po ndryshon tha ai, as me grushtin e komunistëve, as me ato dy gishtat, as me tre gishtat e atyre që rebeluan dhe dogjën Shqipërinë po as me gishtin e ‘frroços’, – vërejti ai – Ndaj ne nxorëm simbolin e shqiponjës dykrenare”.
Para 1000 aktivistëve të Tiranës, Spahiu dha 10 ndryshimet e AK me PS dhe PD.
AK: Ne, Shqipëri të bashkuar – ata të coptuar.
AK: Ne, mandate të kufizuara – ata poste të përjetshme.
AK: Ne, kthim pronash – ata pushtim territoresh.
AK: Ne, ulje taksash – ata ulje qepenash.
AK: Ne, zgjedhje të lira – ata 50 euro vota
Aleanca Kuqezi: Ne duam punësim – ata emigrim.
AK: Ne, shtet të drejtë – ata parti-shtet.
