Në një konferencë për shtyp të lajmëruar dhe më parë, Kryeministri i Shqipërisë, Edi Rama, ka dalë përpara mediave dhe publikut për të folur për Reformën në Drejtësi.
Fillimisht Rama ka falënderuar dy ambasadorët Donald Lu dhe Romana Vlahutin, për angazhimin e tyre që në fillim dhe për mbështetjen e jashtëzakoshme në këtë proces, të cilin ai e ka cilësuar historik.
Rama shprehu keqardhje për deklaratat e bëra një ditë më parë nga kreu i opozitës Basha, duke i konsideruar një përpjekje për të hedhur hi mbi deklaratat e tij. Sipas Ramës, vendet e rezervuara nuk janë pranuar nga mazhoranca dhe nuk do të pranohen.
“Jam i keqardhur që kreu i PD bëri një përpjekje të kotë, për të hedhur hi syve të opinionit publik. Ai tha dje që unë kanë pranuar vendet e rezervuara, duke shtrembëruar deklaratën e time. Nuk i pranojmë vendet e rezervuara, por kemi pranuar të punojmë për një zgjidhje substanciale, në të mirën e përgjithshme.”
Konsensus po, u shpreh Kryeministri, por pa shkelur parimin e panegociueshëm të transparencës dhe të radiografimit të çdo individi, që do të vazhdojë të punojnë në Reformën në Drejtësi.
Sa i përket mesazhi të Bashkimit Europian, Rama tha se ai ishte i qartë, pa reformë nuk ka negociata.
“Mesazhi i Bashkimit Europian ishte i qartë, pa këtë reformë nuk ka mundësi për integrim. BE nuk e pranon me notë kaluese një reformë ku radiografimin e çdo prokurori e gjykatësi e bëjnë partitë politike. As Shtetet e Bashkuara nuk e pranojnë si zgjidhje. Çdo lloj kompromisi, siç pretendon opozita, do ta kthente këtë organ të sistemit të drejtësisë në zorrën e partive në sistem”, theksoi ai.
I pyetur nga gazetarët për arrestimin e Kryebashkiakut të Kavajës, Elvis Rroshi, Kryeministri tha se nuk kishte asnjë koment, megjithatë ai tha theksoi se kjo çështje duhet të zbardhet me përgjegjësi.