Partia Demokratike përmendi emrat e 8 drejtuesve të lartë të Policisë së Shtetit, që – sipas saj, – drejtojnë biznesin multimilioner të mbjelljes dhe trafikimit të drogës.
Opozita thotë se denoncimi i saj bazohet në informacionin e ardhur nga shërbimet partnere, sipas të cilave, drejtuesit e Policisë së Tiranës, Vlorës, Beratit, Dibrës, Krujës dhe Burrelit menaxhojnë disa dhjetëra mijëra rrënjë kanabis.
Ndaj këtyre akuzave ka mbërritue menjëherë reagimi i Policisë së Shtetit.
Në njoftimin e saj për mediat, thuhet se:
“Për të disatën herë, nga foltorja e subjektit politik Partia Demokratike opinioni ndjek të njëjtat sulme kundër Policisë dhe drejtuesve të saj.
Policia e Shtetit në respekt të këtij opinioni ka vetëm një përgjigje të shkurtër dhe të qartë: nuk ka asnjë tërheqje në këtë luftë kundër krimit dhe paligjshmërisë.
Edhe për PD-në përgjigja mbetet e njëjtë: për çdo akuzë dhe fakt të pretenduar, t’i drejtohet Prokurorisë. Kjo është e vetmja rrugë për të ndërtuar shtetin e së drejtës, ku politika t’i përmbahet ligjit e institucionet të bëjnë detyrën pa presion politik”.